電影《回魂凶鈴》"RINGS"
2017-02-21
改編自日本作家鈴木光司同名小說的《午夜凶鈴》系列，從1998年搬上大銀幕以嚟，已經榨乾咗唔少人的膽汁，單喺日本已經先後上映咗6部相關電影，去年仲玩到要crossover《咒怨》系列，實行貞子對伽椰子兩大鬼后對決。
呢部賣座系列一向被公認為日本恐怖片的最強代表之一，之前已兩度被荷里活翻拍成2002年的《七夜冤靈》（The Ring）同2005年的《鬼迷剎瑪莉》（The Ring Two），喺亞洲以外一樣咁好叫座力。
貞子從電視螢幕爬出嚟的橋段，當年嚇到唔少觀眾都唔敢睇電視同接電話，現實生活中充滿恐怖氛圍。作品最成功之處，在於結合咗人人屋企都有的電子器材：錄影機、電話、電視等，令人印象深刻到一睇到電視就諗起貞子，一聽到電話聲就聯想到7日必死的電話凶鈴。咁有話題性的故仔，當然能夠打破恐怖片的票房紀錄。
咪亂開電郵！瀨嘢好難搞！
事隔咁多年，都已經冇人再用錄影帶，貞子仲點出嚟嚇人呢？你以為冇人再用錄影帶就可以終止死亡詛咒？
少年，你太年輕了。呢個世界總有啲人鍾意懷舊，好似今集《回魂凶鈴》（Rings）中的生物學教授加伯列就好鍾意去二手攤檔尋寶，點知尋著睇完7日後必死的「死亡錄影帶」……就係咁樣，剎瑪莉（Samara，荷里活版貞子）又再回魂。
今次剎瑪莉（Samara，荷里活版貞子）仲識得利用電郵傳播影片，令更多人瀨嘢，搞到《潛逃時空》（In Time）尊尼加歷奇（Johnny Galecki）飾演的教授都冇晒符，更連累埋意大利女星瑪蒂迪盧絲（Matilda Lutz）同《第五天劫》（The 5th Wave）亞歷斯魯（Alex Roe）飾演的一對學生情侶。所以喺度忠告各位，唔想7日後無命，就千祈咪亂開朋友傳嚟的電郵！
為救男友以身試咒 拆解背後驚嚇真相
實驗生物學教授加伯列（尊尼加歷奇 飾），睇完舊錄影帶即收到「7日」詛咒凶鈴。為咗證實冤魂存在，佢不惜召集學生做實驗，一個睇完片傳畀另一個睇。茱莉亞（瑪蒂迪盧絲 飾）知道男友賀特（亞歷斯魯 飾）沉迷其中，決定以身試咒救男友。
一睇之下，發現片中竟有一段全新的戲中戲！茱莉亞隨即受到感召，開始出現幻像，憑住種種蛛絲馬跡逐步接近詛咒背後的駭人真相。死期嚟臨之前，佢能否破解箇中玄機，及時救返自己同男友呢？
角色介紹
賀特（亞歷斯魯飾）
沉迷靈異事物的大學男生。起初向女友隱瞞睇過「死亡錄影帶」?事實，不想連累女友，並堅信教授能夠幫佢脫離詛咒。
茱莉亞（瑪蒂迪盧絲飾）
賀特的痴情女友。因與賀特失聯而獨自去校園搵佢，結果發現男友中咒；縱使被靈異現象困擾，仍不惜一切，勇敢冷靜咁尋找詛咒背後?真相。
加伯列（尊尼加歷奇飾）
實驗生物學教授。自己睇完死亡錄影帶後，為咗證明靈魂存在，搵嚟學生做實驗，令事件一發不可收拾。
布克（雲遜迪安洛費尼奧飾）
神秘、眼盲的墓地看守，以前係神父。茱莉亞懷疑布克好可能同死亡詛咒有莫大關連，明查暗訪下發現駭人真相。
梗有一個剎瑪莉喺左近！
「詛咒錄影帶」就似剎瑪莉的化身，係整個系列不可或缺的元素，所以今集《回魂凶鈴》依然係因為一餅錄影帶而起。不過，呢個死亡咒的傳播方法，已經隨住科技進步而變得唔同。今時今日，電腦同智能手機普及，隨時隨地撳個掣就有得輕鬆睇片，好多人搭車又睇，食飯又睇，返工都偷偷地睇，返到屋企更加係盡情咁睇。
導演查維亞吉迪雷斯（F. Javier Gutiérrez）就想探索下科技點樣影響呢個恐怖故事，仲話：「唔單止睇片好容易，複製同傳播詛咒都好容易。撳兩下就可以傳出去畀好多人，佢哋一開手提電腦同手機就睇到。而家周圍都係螢光幕，所以咪以為自己冇可能見到剎瑪莉。」
特效化妝令人毛管戙 剎瑪莉再現駭人軟骨功
睇過呢個系列的影迷，最深刻的印象一定係剎瑪莉（或貞子）好似蜘蛛咁屈曲手腳爬出井口的畫面。咁的肢體動作對於特技演員嚟講頗具難度，特技指導Keith Campbell喺上集同日本導演中田秀夫合作時都曾經出現爭論，但導演為咗加強恐怖感，最終堅持唔用CG特效，起用出身於馬戲團家族?特技演員寶妮摩根（Bonnie Morgan）。
今集導演依舊摒棄CG，所以特技指導Campbell今次繼續搵嚟擅長軟骨功的寶妮，重現經典的呢一幕。除咗特別的爬行技巧，剎瑪莉的化妝同樣係一絲不苟。據化妝師所講，3人組成的特技化妝團隊每朝都要用6個鐘，由頭到腳幫寶妮身上的假肢體上色化妝，又塗上暗沉的顏色同潤滑劑，令剎瑪莉的恐怖程度提升到更高層次。
電影《回魂凶鈴》"RINGS"
導演：查維亞吉迪雷斯
演員：瑪蒂迪盧絲、亞歷斯魯、尊尼加歷奇、雲遜迪安洛費尼奧
級別：IIB
片長：107mins
語言：英語 (中文字幕)
上映：2017年02月23日
+more
