3 妹郭嘉盈處女美容廣告性感小吊帶大曬健康性感「阿哥睇完話要幫手出寫真!」

2022-08-09

「造星 4」出身的 3 妹(郭嘉盈)，出道後獲得不少廣告商青睞，密密接Job，近日更「處女下海」接拍首個美容廣告，3 妹表示心情興奮又期待，坦言：「因為自己平時都好貪靚，所以對於肌膚保養有一定要求，揀選 skin care 產品同 facial 服務時都唔會「求求其其」。咁啱呢次合作可以將嗜好變成工作，真係雙倍開心! 」而拍攝期間 3 妹亦嘗試了不同造型，除了清純露肩裝扮，當中的白色小吊帶長裙更大派冰淇淋，毫不吝惜露出白滑玉背，因此 3 妹也非常期待廣告出街後的反應。

素顏見人好尷尬性感小吊帶造型「阿哥都話正」

拍攝其間 3 妹要親身體驗美容療程，因此要在眾目睽睽下素顏示人，以及被專家用儀器幫皮膚作深入分析，令 3 妹大為緊張：「Facial 做得多，但喺咁多人面前做咁大個人都係第一次，都有啲尷尬，但過程都好舒服同享受，同埋事前仲要將皮膚深入分析比人睇，好彩平時都有護膚，無嚇死隔離」。除了體驗療程，3 妹亦要換上白色小吊帶長裙上陣，她坦言平時都會有些小性感，但這類型長裙就比較少，她表示：「個側身都開得幾低，差唔多到腰位，事後都有俾啲相阿哥 193(郭嘉駿)睇過，佢仲講笑咁講：「正喎! 遲啲書展要幫你出返本寫真，應該都賣到十本八本」，但我知佢口硬心軟，其實係真心覺得我著得靚。」

希望未來有更多嘗試幫返阿哥「搲撈」
對於首次「處女下海」拍攝美容廣告，3妹感覺新鮮，同時感謝客戶信任及支持，希望未來可以有更多嘗試，並希望有一天可以幫回阿哥「搲撈」。3妹表示:「早前阿哥有工作都預埋我，話幫我「搲撈」，希望將來有一日唔再係佢有工作預埋我一份，而係自己有工作都可以預埋佢一份，幫返他「搲撈」」。